鳴橋燒肉料理 (已結業)

近日發現原來旺角砵蘭街入面有一間小小嘅日本居酒屋，今日就決定嚟試吓。環境真係唔算好大，座位亦都唔算多，所以唔會太多人太嘈。呢度主打係燒肉放題，但係呢度都有午市套餐。無論係放題定係套餐，價錢都好抵食。我哋今次就當然係試吓放題先，老實講食物選擇比出面一般連鎖大型放題的確唔算太多，但係一般放題有嘅食物種類，例如刺身，炸物，熟食，肉類，海鮮，甜品，飲品都應有盡有。刺身同海鮮食落都新鮮。肉類唔會有雪藏味，同時都醃得夠味。個人最喜歡芝士豚拖羅，其實係五花腩上面加咗芝士粉。將五花腩燒到油份迫哂出黎之後，加埋芝士味又香又脆。好鍾意呢度嘅燒爐上面會加張牛油紙，唔怕啲肉痴底產生好多焦，仲感覺衛生好多。食完燒肉最怕成身油煙味，但係呢度嘅抽風系統幾好，食完完全冇味，可以繼續行街街。