十三少 (已結業)

元朗國開左間酸菜魚，我地冇book枱7點幾黎到已經full house，好彩等左一陣就有位！二人套餐好吸引，$300頭有齊酸菜魚、前菜小菜、兩碗飯同甜品，真心抵。涼拌土豆絲好爽口！食果陣覺得好惹味，原來落左蒜蓉，平時自己整都諗唔到可以加蒜，好食好多。酸菜魚好大盆！無錯係盆，真係好大兜，魚肉好大片又好嫩滑，要好小心先夾得起。面頭啲芝麻好香。最欣賞佢落左好多炸過既菇片，索味又香口。魚肉就咁食都唔會咸，加小小湯同咸酸菜，好岩送飯。魚無得揀辣度，我食開譚仔3小覺得岩岩好🥰麻婆豆腐啲豆腐好滑要用匙羹先食到，惹味得黎又唔太咸，又係白飯好朋友。紅糖糍粑等左10分鐘先上，原來係即叫即炸😋其實食完主菜都好飽，但呢個糍粑外脆內軟加埋紅糖醬真係好鬼正，有陣焦香味，我地好飽都食晒。