叁去壹點心粉麵飯 (已結業)

黎叁去壹最緊要食既唔係點心，而係佢哋既古早味情懷～淨係佢哋既裝修都感受到滿滿既年代感～ （坐落喺前西區裁判法院斜對面，得到西區土著科普話以前哄動一時既某明星頂包案就喺係呢度開庭～）叁去壹點心價錢方面都算相宜～而且食得出唔係一般工場出品，而係佢哋既自家製手工點心～蝦餃燒賣都係21蚊四粒細細粒容易食，蝦餃🦐皮晶瑩通透唔係薄身皮但火候控制得好唔會蒸到溶溶爛爛一夾就散晒，蝦味唔出但幾爽口～蟹黃燒賣紮紮實實幾啱我口味～豬肉混合冬菇🍄夠鮮美，同平時唔同係呢款唔會太肥膩但又帶有油脂香～棉花雞有冬菇，雞，蟹柳，墊底既魚肚脹卜卜索滿湯汁，仲有個芋頭係超冧入口即化～呢兩樣先係個靈魂所在～鳳爪正常比平時偏甜小小～ 蠔油腐皮卷個樣好普通但食落足料好味，有椰菜、木耳、紅蘿蔔呢啲配料令到口感豐富。加埋蠔油芡完全係細個食開既口味～牛肉球無平時既馬蹄同芫荽味，肉質彈牙～加埋喼汁更加正～其實幾鍾意佢哋相對比較袖珍式既點心🫖 就算係一兩個人去都可以試下唔同既款式～當日去唔見佢哋隻貓貓，略有所失，下次經過再去探下貓貓～p.s. 記得佢哋既營業時間係05:30 - 14:30，唔好摸門釘呀～