牛車水餐廳 (西九龍中心) (已結業)

與女兒逛完先施，不想拿著一袋二袋離開商場搵食，行勻整個西九龍，都冇間想入的，行到落下層已經累了，見到牛車水有大把卡位，就衝咗入去。我們叫了牛柳配雞中翼配沙律餐，牛柳配蝦天婦羅配沙律餐，沙嗲雞串半打，飲品叫了凍檸茶及凍啡少甜。先講個沙律，有點像舊式美而廉餐廳那款口味，算是不過不失。牛柳過熟，很難才咬得爛，我以為自己牙力不足，問亞女，您個件牛柳可以嗎？她都擰曬頭。再問她雞翼好吃嗎？她說超市的CP雞翼較好食。我果兩條蝦天婦羅，層粉漿太厚，似凍肉店賣的現成貨。至於果半打雞肉串燒，嚡烚烚，沙嗲醬很淡味的，我同女兒各自勉強吃了一串，便吃不下去了。至於凍檸茶屬正常茶記味道，杯啡又係好淡，沒咖啡香。食物上檯速度很慢，伸手去叫人追單，睇到扮睇唔到，被迫要開聲叫人，埋單連加一$250蚊。食完出門口，我同女兒都不約而同說:早知道差成咁，回屋企樓下茶餐廳食碟頭飯好過🤦‍♀️。(總結):食物唔得，咖啡唔得，服務都唔得。但、每人的口味都都有所不同，對我來說，不會再有下一次。