安樂茶飯上膳 (已結業)

其實已經係九月尾時候去哩度食‥不過宜家先留個評語。係平日既星期三，六點多d去到‥好少人。得到門口侍應既熱情款待，又話六點至七點九埋單而又食套餐，有八折優惠。其實一心諗住去試下，梗係入左去啦！Menu中好多款菜式都好特別，好想試晒咁多…可惜我地兩個人，點可能一次試晒。芝士焗蕃茄好好味！原來蕃茄中間既芝士上釀入墨魚膠，芝士味唔重，如果太濃會好漏，墨魚好彈，配上酸酸甜甜既汁，中和芝士味，恰到好處。蒜蓉蒸娃娃菜唔錯，幾香，但係份量太少。餃子釀雞翼，係去之前必試之選，餃子饀好得意，真係用包餃子既饀造咖！油鹽水菜粒蒸飯就唔得喇！得少少冬菇粒同粟米粒，仲要無乜味，同食白飯差唔多。套餐跟既燉湯好好味同好清，係竹庶茅根海底椰排骨湯。餐亦跟個煙鵝胸雜果沙律，唔錯喎！仲叫咗個咕嚕蝦球，我覺得好好味！外脆內滑！當你咬住佢既時候，連噴出黎既口氣都有好香既蝦味咖！不過唔好放到凍晒先食，會無咁脆。所有款式都係細細碟，同多一兩個朋友仔去就可以試多幾款。環境舒適，員工態度值得加許！佢地服務態度好好咖！總括黎講我一定會再去，因為仲有好多菜式想試。