波士廳•101

營業中

休息中

外父80大壽，想搵個特別嘅地方枱慶祝一下，最後揀咗喺九龍最高嘅大廈食飯，人多要包房，最低消費$12,600。呢度係代客泊車，但泊車嘅地方冇傷殘電梯上到8樓轉101樓電梯，個設計有啲奇怪？最後要先放低外父係8樓再返去一樓泊車，行動唔方便的老人家，有D麻煩。上到去101樓，原來都有幾間餐廳，間間都好似幾高級下，由餐廳門口行入去影相，睇晒成個西九龍嘅全景，大地在我腳下嘅feel，景觀真係唔錯，但最好梗係望中環嘅海景啦，下次可能要去其他望中環的餐廳試下。先訂了午市商務套餐B，因為未過最低消費，最後加點每人一隻帶子同埋炸雞。前菜的XO醬內乾瑤柱份量好多，好香但又唔算辣，有水準，所以幾個人空口都清佐3碟，立即叫侍應再上多幾碟，最後比錢時發現每碟要收$23，都唔算平。先來點心拼盤，黑松露素菜餃嘅黑松露好突出，個皮亦都好煙靭好薄；蝦餃亦到好似超過兩隻蝦，好新鮮好爽脆；春卷就普通啦，個皮炸得唔係好脆或者烤完放耐左少少。生磨杏汁嫩白肺湯係成個套餐最好食嘅菜式，感覺真係老火湯，啲豬肺好淋好入味，杏汁味唔算重，反而都應該落咗唔少椰汁，好滋潤好清甜。大漠風沙蝦球其實係鹹蛋黃蝦球，唔見到風沙，蝦及炸的水準還可以。