亞萊泰 (黃大仙中心北館) (已搬遷) 新店位置

難得母親節，諗住高高興興食餐好嘅慶祝吓，點知無高興仲要掃興而歸，真係唔會有下次。以前都有幫襯過，記得以前味道也不錯，無諗到依家咁無得頂，係難食到無得頂！冬蔭功稀流流、淡某某，海南雞鞋烚烚，炒蜆有沙又唔開口，粉絲蝦煲無泥味道蝦又不新鮮，炒飯、炒貴刁、炒菜叫做放得入口，最好味係個白飯囉！嘢食難食已經好無癮，職員態度差到不得了，叫親都係話轉頭，最離譜係個收銀，手腳已經慢，仲要停曬手四萬咁口歡送熟客，完全無視我在等侯「拍卡」付款。（因為我需要拍卡，所以要行出去收銀櫃枱埋單）。佢同事已經打咗單，同佢講咗客人拍卡，完全無理會，個同事仲提佢話客人等緊你，佢依然無理會！我終於忍唔住開聲叫佢快啲，佢唔係講聲唔好意思要你等，係開口反駁我，話自己做緊嘢無十隻手、顧唔到咁多嘢喎！即時火滾，顧唔到咁多嘢又可以停曬手四萬咁口不停同熟客講bye bye？仲要無拿拿林加快處理、停曬手咁不停反駁我佢忙緊，咩料呀，唔係話客人永遠是對的，但基本待客之道都無！係咪熟客先招呼？奉勸各位不要貼錢買難受！