爆汗串串 (已結業)

今次係我地第三次食啦！第一次誤打誤撞係佢開業無耐就食過，一試難忘，之後就番唔到轉頭，仲試過放工揸30分鐘車去買外賣添呀😂 之前未有放題要逐樣點，而家既放題就更抵食，可以食到好滿足先走！是夜放工七點幾去到，生意好好，餐廳大概有三十幾個位都滿哂，等左陣先有位。有六款麵同三十幾種串串揀，同平時個啲要自己行去雪櫃拎既餐廳唔同，點完菜侍應姨姨會送到張枱。每次差唔多食完，姨姨仲會問我地仲想食咩，搞到越食越多😂我地食左三轉，每轉都二三十串，好爽！個麻辣燙汁會同第一轉既串串一齊上，之後就係師傅煮完再擺落自己枱既麻辣燙汁度。我地最推薦既串串有: 千層肚、萵筍、土豆、肥腸佢地真係好入味，個汁真係好香好麻，我中意食辣但又唔食得太辣，覺得岩岩好！另外，我地仲叫左兩個小食：蒜泥青瓜同鐘水餃，份量啱啱好，唔會太少但又唔會食到飽哂食唔到其他野。個青瓜好脆，個餃皮薄餡靚，正！最後，加$30 就野飲就有得任飲！食辣野飲汽水既重要性相信大家都明，所以任飲真係好緊要😂 唔中意汽水既朋友可以揀冇咁熱氣既茅根竹庶水同啤酒呀。