CHEF STAGE de Eddy Chu (已結業)

呢輪天氣持續放晴及酷熱，搵間有靚景又好味嘅特色西餐廳，呢度絶對入圍。無嚟一排，發現有呢個”每樣試晚餐” ($388/位)，計埋湯及甜品共有七樣嘢食，岩晒想試多D菜式嘅友人。突然聽到有人唱歌，原來有新增駐場歌手，即席彈結他唱經典外國金曲，炒熱氣氛。無需等太耐，首先出場係日本麵豉帶子薄片配鮮蝦肉，凍食海產類係炎夏日子食確係岩數。軟滑香甜帶子片與麵豉汁都幾夾，蝦肉都彈牙，作為頭盤………..加分。食完凍盤到熱盤，松露煮日本年糕，以獨有香味松露煮成香滑忌廉汁，加埋爽口洋蔥碎，與煙韌嘅年糕齊增唔同口感。呢個焗連殼食法國田螺，點連殼食呀?! 原來個殼係用餅底造成，將彈牙田螺肉與軟滑香草薯蓉”釀”返落個”殼”入面，真正做到”連殼食”，食得”亨鬆”。夠晒熱度嘅係呢客黑松露蘑菇湯，淋上少少忌廉增加香滑度; 飲到黑松露嘅獨有香味及食到蘑菇碎粒，若有埋個餐包配食就好啦。飲完個湯，再送上鮮鱸魚柳酸甜香草汁魚皮煎得微脆，啖啖肉，個醬汁味道近似食泰國生蝦嘅酸甜汁，幾惹人胃口。主菜各自點選牛及豬，我呢份係慢燒美國牛肉眼，底部以蕃薯蓉及羽衣甘藍作配襯。肉眼已經夠腍，仲要係用慢煮手法去處理，四至五成熟度，輕鬆切開無難度。