二少廚房 (已結業)

是日要加班，加完後又黎左呢度食二少，因為想飲啖湯嘛。上次飲過佢嘅雞湯好好味，呢排少湯水就諗住黎飲啦，點知咁啱賣晒要等下一輪，等左大概半個鐘左右先有呀。等個牌子響等得好心急，幾時先有得食呢。好嘢，齊哂啦，是晚叫左燉湯撈麵。五款手撕雞中揀左日式麻醬口味，拌上西生菜。麻醬真係好好味，配咩都咁正。雞肉有咬口帶鹹香，無筋無骨真係食得好方便，啱哂我呢啲懶人呀。本來手撕雞係配白飯的，今晚就加左八蚊轉做呢個秘製醬拌麵，就是粗麵加上辣醬花生碎等，微微辣帶蒜香好味呀，再倒埋麻醬同雞黎個大雜燴都唔知幾正。上次試過雞湯，今次就試下蓮藕蜜棗排骨湯先。熱辣辣原汁原味，入口一陣魷魚味，攪下啲湯渣又真係有魷魚，哈哈，好濃郁好正，望落有點油，但飲落一啲都唔膩，好好飲。更新左嘅餐牌，麵食同餃子餐都係新㗎。仲有多左儲印仔優惠添，成日食嘅記得儲啦。佢個湯同埋雞真係好好味，慢慢黎試哂咁多款口味先。