有得餃 (已搬遷) 新店位置

一直都想試下呢間餃子店，每一次經過都見到間舖都見到出面有一大堆人。今次又係未夠7點終於見到佢唔洗等位，梗係要入去試下係咪真係咁掂啦。既然餃子係主打，餃子就一定係走唔甩啦。兩個人叫左一個麵，一款餃子（8粒）同埋一碟油。叫左個炆腩肉撈麵，炆腩肉好入味，而炆腩肉當然係有d肥啦，好食嘅話肥少少間唔中食下都唔緊要啦！麵條係粗身嘅麵，唔會煮到過淋，撈埋d腩肉汁一齊食都唔錯。最後我加埋點餃子嘅醬汁一齊食，酸酸地仲開胃wor！五花肉嘅份量都唔少，兩個人share 食就唔唔會話太膩。餃子叫左田園香茜花木耳豬肉餃。豬肉餃皮唔算薄，亦都唔算太厚，可以接受，餃子餡亦都算好多，加埋佢個酸酸地餃子汁好開胃啊！餃子個賣相雖然係平平無奇，食落一d都唔失禮，加埋佢既餃子汁真係唔錯。佢既餃子汁仲可以揀辣同唔辣，我揀左唔辣。另外叫左碟油菜，一上枱有成半個菜咁多我都有d嚇親，好少見舖頭叫油菜會有咁多！落單嗰陣姐姐仲問我地要唔要走油，好細心。餐牌上面仲有好多唔同嘅餃子，搵日要再過嚟試多幾款先得。