歡喜燒 (已結業)

啱啱喺觀塘呢個有眾多outlet臨立嘅駱駝漆大廈shopping 完之際，咁啱見到呢間叫歡喜燒嘅無火串燒放題，好似幾新穎咁，就帶埋小女友去試一試。店內每檯都設有一部用發熱管嘅燒烤爐，而每部燒烤爐上所放嘅串燒都可以自行轉動，將串燒均勻咁燒熟，而呢度店員會細心講解，亦會不時會協助，所以整體食嘅時候都算係順利。串燒全都要出外自取，種類繁多，有肉類，蔬果，丸類等，肉類醃得非常入味，大小適中，所以唔會話有燒唔熟嘅情況發生，喺咁多款肉類最滿意可謂泰式雞柳同埋牛柳，牛柳牛味濃郁，泰式雞柳除左肉嫩多汁外，泰式醬嘅味亦完全滲入雞肉內，非常惹味。除左串燒外，呢度仲有不同嘅炸物，全部都係即點即炸，保證全都做到香脆無比。食到最後當然要食返啲甜品，呢度有不同嘅雪糕雪條供應，除左呢啲仲有不同味道嘅啫喱杯仔，依家仲供應埋台式芋圓添，芋圓煙韌非常，配合埋仙草凍同埋黑糖珍珠，有如好似係台灣食嘅一樣。