火鍋英雄 (已結業)

又嚟食依度嘅酸菜魚，依度酸菜魚嘅湯最好一點就係飲得，而且唔鹹，加上一個隔渣嘅貼心湯勺就啱啱好。前菜款式眾多，辛辣味重嘅麻辣豬耳薄薄一片，入口爽脆；脆藕酸爽，開胃惹味；木耳都非常入味，其他小菜都清爽可口。魚肉嫩滑冇骨，入味之餘又自身帶有魚嘅鮮味，加上調味用嘅花生酸菜，香味更加有層次。牛肉肥瘦相宜，入口溶化，牛味鮮濃。寬粉索哂酸湯嘅香氣，口感煙韌。餃子皮略厚，但係勝在餡料豐富。手打丸新鮮彈牙，特別係鯪魚球相當鮮甜。毛肚爽口，清理乾淨冇腥氣。雜菜籃都好豐富，最好味就係娃娃菜，甘甜可口。甘蔗水清甜解渴。