泰.夯蝦 (堅拿道西) (已結業)

咁多年喺香港食放題就食得多啦，今日朋友帶咗我嚟灣仔嘅呢一間放題，估唔到喺香港都可以食到泰式放題。價錢適中，但係最緊要環境氣氛一流，好有泰式嘅感覺。一坐低，職員十分之有耐性教我哋成個流程要點樣做，啲蝦隻隻好新鮮，自己係魚缸度夾上嚟，放落啲冰水度浸暈佢，就可以上爐燒啦，如果怕整污糟件衫，仲可以有圍裙，十分之企理乾淨。除咗蝦，就梗係唔少得仲有好多串燒嘅肉啦，全部都好新鮮，而我最鍾意食嘅就梗係雞軟骨啦，食得雞軟骨又點可以少得泰式辣醬啊，佢連醬料都好齊全㗎，牛油，泰式辣醬，魚露，等等全部都一應俱全自己攞。甚至連海鮮，全部都好新鮮，而且擺放整齊，又有熟食，就算天婦羅炸蝦，都真係入口趣博博㗎，唔會覺得擺咗好耐咁，我一口氣食咗五隻啊。