倫哥尊尚火鍋私房菜 (已結業)

每次食雞煲都鍾意試下唔同店，今次就來左呢間倫哥雞煲私房菜！侍應叫我地關蓋煲大約7-8分鐘之後，一定要炒下d雞，如果唔係就痴底。我地一打開個蓋就感受到呢間嘅雞煲同其他店嘅唔同，呢度嘅雞煲裡面嘅調味香料係十分濃郁，以至於係煲滾煙冒起嘅時候，個種味係會令到你打乞嗤嘅程度（特別係如果你個鼻比較敏感），越辣就越勁，我食其他嘅雞煲係未試過咁，可想而知呢雞煲個味道係幾咁惹味，非常香辣可口，而且份量都好多，兩個人淨係食完個雞煲都已經飽飽地！食完雞煲就到火鍋啦，我地揀左薯仔蕃茄湯底。最正就係呢個海鮮拼盤，有鮑魚、青口、蝦、帶子等等，海鮮配以冰塊上碟，保持新鮮度，所以D海鮮熟後食落都幾爽口，唔會霉霉嘅感覺，我就特別喜歡佢個鮑魚，食落有種鮮甜嘅味道！呢度嘅肉都係任叫嘅，我地叫左豬同牛，可能我淥得有d耐，牛肉食落比較韌，所以我鍾意呢度嘅豬肉多d，口感更為嫩滑！呢度飲品除左汽水之外，仲有烏龍茶等幾種茶飲，對於唔飲甜野嘅我來講就o岩曬喇甜品係冰粉，幾特別，冰粉夠凍夠滑！