釣魚翁 燒鵝．海鮮飯店 (已結業)

上次都介紹過醉翁亭嘅早餐好抵食，事隔兩星期我哋又去食啦。今次我哋叫咗兩份孖寶，再加多一個馬拉糕，最後埋單都只係$95。真係好抵食，而家出邊一個茶餐廳食個早晨常餐都要$40啦。今次專登再寫食評係因為個馬拉糕真係好好食，係傳統懷舊嘅馬拉糕。唔會太甜但係又有黃糖嘅香味，好鬆軟而且唔會俾啲蒸氣搞到林啤啤，熱辣辣蒸出嚟我哋唔使3分鐘就食晒。不過個魚肚粥就非常麻麻，完全冇料。搵斗成碗粥都只係得三舊魚肚仔，每一舊仲細個隻手指尾，粟米都係得個幾粒，都幾失望。不過就味道唔錯囉。仲有好抵讚嘅係侍應姨姨好勤力， keep住幫我地收走啲冇用嘅碟。傳菜的姨姨態度都好好。不過佢哋啲水真係唔夠熱，沖出嚟啲茶都唔係好香。