蘭芳園

營業中

休息中

今日同朋友去開中環，忽然好想飲奶茶，就決定去蘭芳園。係餐廳出面排左一陣隊，好快就有得入去。餐廳既服務態度真係一般，我地舉左好耐手叫侍應哥哥黎寫野都無人理我地，一係就望下我地然後就走左去，再唔係就係好惡咁叫我地「等陣啦！」然後又無左回事，可能真係太忙做到燥燥地？最後我地坐係到等左差唔多10分鐘先有人黎寫野。我地叫左佢最出名既蔥油雞扒撈丁同凍絲襪奶茶，上茶速度都算快。對佢既蔥油雞扒撈丁真係好失望阿。雖然佢廚房擺滿左一箱箱出前一丁，但個麵底又乾又硬，好似啲普通公仔麵咁難食，我同朋友都懷疑過個麵到底係唔係出前一丁黎。蔥油份量真係好少，根本唔夠用黎撈麵，好失望。而豉油就好多，令到成個麵變左好鹹，根本就係食緊雞扒豉油撈丁拌蔥油。反而值得一讚既係雞扒煎得唔錯，雞皮夠脆，入面既雞肉都算嫩滑，有肉汁唔乾，而且雞扒好入味。佢既馳名凍絲襪奶茶真係唔錯，入口順滑，茶味好濃，又唔算好澀。餐廳既食物真係偏貴，而且服務態度一般，見到個侍應哥哥忽然大聲喝幾個遊客，叫佢地坐返好啲同放返入啲個袋，有啲得人驚，如果可以改善下就好啦。