Wagyu Ya (已結業)

今晚同男朋友黎到尖沙咀食日式燒肉，想食好少少，所以揀左新開既Wagyu Ya食晚餐。餐牌選擇唔多，侍應話餐牌係暫時既，以後可能會作出改動。除左燒肉，亦都有熟食提供。最終我地揀左黑松露和牛他他，豚肉同牛more拼盤。黑松露和牛他他有輕微燒過，帶出少少油脂，咬落唔會韌，好食。和牛他他用沙律菜墊住，沙律菜好爽甜，都好好食。跟住開始燒豚肉，原來係豬腩肉。我唔好豬腩肉，但都覺得好食。燒完唔會乾身，好好咬，帶點甜味。點埋佢個三款醬汁：燒汁，酸汁同岩鹽，味道更佳。牛more拼盤有牛肩脊，三角，牛小排同厚切牛脷，每款各三塊。樣樣個樣都好靚仔，燒出黎都冇失望，油脂豐富，完全唔韌，鎖住肉汁，有牛味。我地對呢餐都相對滿意。