撈喜 (已結業)

同事講呢度有花膠入饌，工作咁忙，都要補吓先得，於是約咗朋友嚟食返餐先。睇完餐牌，同朋友二話不說，就叫咗個撈喜豪華餐，豪一豪佢先! 墊枱紙都有介紹花膠嘅好處，又長知識啦!湯我同朋友都揀咗招牌美人湯，即係花膠燉雞，一飲就叮一聲，因為個湯好清甜，一定係用咗唔少料頭去燉製，裡面有成大塊花膠，仲有雞腳、雞件、瘦肉、杞子、紅棗同雪蓮子，好正呀! 招牌花膠撈麵又係有一大塊花膠，撈粗嘅汁應該係蠔油鮑魚汁，加埋蝦子，食落更香，仲有冬菇同西蘭花，健康又美味。小食又係可以喺幾款裡面揀，叫咗香煎鹿兒島牛柳粒，牛肉味香濃，有頭，唔錯! 泰式豬頸肉煎得好香口，配埋個汁，好惹味。跟餐仲有個灼菜，最怕食油菜好多油，呢度剛剛好，啲菜又唔會好淋，好食! 食飯期間，店員細心有禮貌，仲會主動加茶，呢啲細微位加晒分。呢個豪華餐好豐富，食完已經好飽，下次有機會，想試埋佢哋嘅花膠甜品呢!