上品火鍋料理 (已結業)

地點幾清幽~ 告士打道望海~ 可惜唔係坐𥦬邊。環境唔錯，通風設施做得唔錯，咁多枱人地方唔算大都可以唔覺有邊爐味。間野都係中上質素，平凡嘅唔講淨係重點講啲抵讚㗎啦！點完湯底同料之後，翅上先。平時有去深水埗食開一間雞燉翅，估唔到火鍋地方都做到嗰啲質素，證明足料好緊要 :0 響鈴應該喺呢度自己整，即叫即炸，色水比平時嗰白淨啲睇落冇咁油膩，點紅色杰杰地嗰啲醋汁一咬不得了，鬆化到化埋我個人，秒清後encore咗。海鮮拼盤有即劏嘅魚，生蠔，聖子，蝦同埋好多膏嘅蟹。條魚生猛到起咗肉之後仲fing嚟fing去，好驚！雖然係好事嚟，d魚片真係好鮮甜，同平時雪藏住嘅冇得比。啲蝦又大隻又漲卜卜，殻易起，都係罕見嘅新鮮蝦～條魚啲頭頭尾尾侍應問我地要椒鹽定係掉埋落去煲，梗係揀椒鹽啦！又椒得好好食喎，分唔到佢沾咗d咩先炸，唔覺有炸粉但又唔係日本料理嗰種會𠝹損口嘅炸魚頭，好正！食到爆瘡都抵！粉絲都係值得一讚，未淥前比較直身同硬，所以淥完唔會淋哂散哂，仲維持返一條條唔會變咗一pat pat，又有彈牙嘅口感，同時又吸得返啲湯味，滿足哂！