孖寶 (已結業)

朋友生日但又驚趕唔切湊仔，於是我就佢入到去上水搵食。朋友推介話試吓孖寶小館，因為次次佢湊仔經過都想試吓，咁就約咗喺到食個lunch。Lunch menu都有幾多選擇，總共有8款。我就揀咗紐西蘭肉眼要五成熟配薯菜，而朋友就揀咗西班牙黑毛豬跟飯，落完兩個餐就即刻上餐湯&餐包，麵包熱熱地幾軟熟，而個湯飲落似西蘭花嘅菜湯，都幾好味。到主菜嚟到，估唔到一間小店佢哋嘅擺碟都幾靚，因為我初時以為會擺到好似茶餐廳就咁放。我碟紐西蘭肉眼嘅肉質都幾軟熟同埋肉汁夠豐富，而當中嘅配菜估唔到咁好食，因為佢哋烚完之後再用牛油炒香，好食到想食埋我朋友嗰份。而我朋友嗰份西班牙黑毛豬，厚切都極到好淋之餘仲要唔乾身，好好味。如果呢個質素而係喺尖沙咀食，我諗都起碼多百幾蚊先可以埋單，而家$200都唔使，抵到爆！