Casa Luca (已結業)

岩岩去完旅行食得太多，返香港🇭🇰就想食清淡啲，於是就同同事去食沙律🥗refresh下。之前食過佢早餐，午餐都係第一次試。餐牌有好多選擇，除左飯同意粉，仲有啲沙律、配菜同主菜🍗配搭既套餐。今次一行三人就叫左個二人餐，包兩主菜兩配菜兩沙律兩飲品，承惠$13X。主菜就揀左豬助骨同豬手🐷，配菜就揀左炒菇同焗西蘭花🥦，沙律就揀左蘋果沙律同南瓜沙律。飲品原本想試下佢餐湯，因為之前見人飲都好吸引，但結果職員話今日唔提供餐湯☹️。豬肋骨食落比較乾同咸，食到好口渴，豬手個皮好硬，咬極咬唔開，而且肉都係凍同較硬身。反而配菜同沙律就完勝主菜。南瓜沙律好軟身又加左提子乾同肉絲，好岩取代米飯🍚。至於蘋果沙律🍎就好新鮮同爽口，仲加左提子乾🍇同合桃，食到停唔到口，唯一不足係對我個人黎講太多醬料。另外，炒菇都非常新鮮又多汁，好飽滿既感覺，西蘭花🥦就同忌廉白汁焗好惹味。整體黎講真係唔錯，水準除左主菜都值哩個價錢，而份量都好夠，我地三個人都食唔哂，下次可以純食沙律配菜餐就夠哂😋。一個字，正！