本色鍋品料理

營業中

休息中

行開去北角，講起想打邊爐，就去左呢間鋪。淨係揀火底都諗左好耐，個個都好吸引，最後叫左個花膠烏雞美人湯做湯底。員工建議飲左個湯先再落野打邊爐，真心冇介紹錯，成隻烏雞同大大舊花膠喺個煲度，未飲已經流晒口水。飲落勁正，十足老火湯一樣。一嚟已經比我連飲左兩碗。之後我地叫左個細嘅牛拼盤、手工丸、粟米、烏冬、水蓮，啲牛同手工丸可以話係必點，真心好食。大家可以試下唔點任何醬就咁食牛，牛味好濃，好食！手工丸一出場個賣相已經贏任食邊爐九條街，即刻停晒手post個ig story先！太心急啦，見到個蟹子鮮蝦丸熟咗拿拿林夾起放入口，一咬啲芝士爆出嚟，差啲灼傷個嘴。食落又彈牙，值得推介。另外大家都可以試下豬肉丸，一樣彈牙好食。打邊爐必食嘅烏冬同粟米好似好普通咁，但同樣有驚喜。個美人湯底配烏冬真係一絕，好夾味。粟米一上檯已經見到粒粒都生到大大粒脹卜卜，果然食落真係超甜。食完想encore，不過真係太飽。呢餐真心係我近年食過好食嘅邊爐，比呢個價係食返有質素嘅野，埋單都埋得甘心啲。PS:食食下電話冇電，好彩佢地有得借充電器。