御品·千之味 (深水埗) (已結業)

今晚經過深水埗見到呢間壽司店，於是入去睇吓有咩食，望一望個餐牌，雖然呢間係壽司刺身店，但佢哋都有唔同嘅日式料理食，見到佢有各式各樣嘅魚生飯，款式種類非常多，搞到我都唔知點揀，最後我揀咗一個五色魚生飯套餐，呢個飯餐有一個餐飲，另外再可以追加一啲魚生或者餃子等等，我就追加咗佢個赤蝦刺身，之後再加多幾款壽司，佢壽司嘅種類都好多，我當然就梗係揀我嘅至愛赤貝壽司同埋吞拿魚壽司，仲有三文魚子壽司啦，首先講話佢個魚生飯，飯同魚生嘅比例啱啱好，而且魚生非常新鮮，飯亦都有日本米嘅味道，分量啱啱好唔會太過飽等我可以試多幾款壽司，而赤貝壽司同吞拿魚壽司，赤貝非常之有鮮味，而吞拿魚就入口即溶，唔會有啲魚筋痴牙，三文魚子壽司，粒粒魚子，喺口入邊爆開嘅感覺真係好幸福，值得一提，係佢個赤蝦，非常大隻新鮮鮮甜，蝦頭有非常多嘅蝦膏，佢個清酒煮蜆都非常出色，蜆肉鮮甜，朔晒啲酒味，最後，佢除咗呢啲刺身同壽司同埋魚生飯之外，佢都有一啲烏冬嘅定食，睇圖片都非常吸引，下次嚟我都會試吓佢個烏冬同埋拉麵定食。