Food Combo (已結業)

屯門區V City 附近一個新樓盤地下開左兩間食肆，今日試左Food Combo, 裝修光猛舒服，坐位唔太逼，坐得鬆動。食物選擇多，價錢唔太貴，幾十蚊有交易，最特別係飲品自助形式任飲，仲要係幾特別嘅熱圓肉杞子薑茶，照顧到鐘意養生飲熱飲嘅人士，呢個簡直驚喜。另外兩款凍飲係香橙薄荷葉水及凍檸檬茶，係而家日日高溫嘅情況下的確可以消暑。午餐有8至10款選擇，我揀左芝士蕃茄牛肉焗飯$68 用鑊仔上，好熱芝士好香，蕃茄同牛肉份量都好多，以價錢嚟講係抵嘅。另外叫左個葡國雞飯$54蚊，雞扒肉有1. 5塊，仲要煎到脆皮，仲要灑上椰絲加上薯仔夠稔份量又夠，抵食。