南대門

營業中

休息中

復活假期前夕，去咗尖沙咀睇醫生。之後就經過諾士佛台行咗去韓國街睇吓有咩好嘢食。之後我就被熱情嘅韓國叔叔感動左入去食呢間韓國餐廳，係3号店喎。門面唔算靚，入邊都唔算好大，不過就好有韓國感覺，細細地都幾warm。叫完嘢食就上咗五小碟前菜俾我哋，有泡菜、芽菜、翠玉瓜、白菜仔同節瓜蝦干。全部都好味！味道一流嘅豆腐海鮮湯！第一件事當然係飲咗啖湯先啦，一入口係濃濃嘅海鮮鮮味，比出邊食開嘅豆腐海鮮湯真係鮮味好多。入邊嘅海鮮都唔差架，有蝦有鮮尤有蜆仔。而豆腐佢真係比成半盒超級市場買開嘅家庭裝豆腐落去，都幾足料。不過當然有不足嘅地方啦，就係佢啲蜆吐沙吐得唔乾淨。但係淨係計個湯來講，佢真係贏晒。食完個又鮮味又辣嘅海鮮湯，就上牛肋骨湯。相對來講我真係覺得好淡。雖然你見到有落紅棗，有少少人蔘，但係真係出唔到牛肉味，紅棗味同蔘味。對呢個有少少失望喎。我決定下次再嚟食佢有Best 字樣嘅菜式，希望下次唔會失望喇！