Diletto (已結業)

約同事傾密計，梗要搵一個比較靜有相對少人嘅地方食中午飯，即刻諗到這間餐廳有秘密花園之稱。個正式入口喺漆咸道南的一條窄小樓梯內，但其實亦都可以喺余仁生中心坐電梯由後門入；佢哋樓下嘅餐牌就有中英對照，但上到去剩係得英文餐牌，比較奇怪嘅設計。餐廳入邊周圍都有好多花嘅裝飾，對住街嘅窗位置亦都全部放滿晒花，真係有啲似坐喺花園度食中午飯，令人心情舒暢；午餐由$88起，喺尖沙咀算中等價錢。頭盤沙律份量唔算多，但係都算新鮮。蒜片蝦肉墨魚麵賣相吸引，黑白相間，蝦肉都彈牙，忌廉汁味道濃郁。蕃茄意大利肉丸意大利飯都幾正宗，只係得3粒肉丸好似太少。紅酒牛肋條配薯蓉紅酒味濃，牛肋條煮得好淋，有咬口亦好入味，份量適中。餐飲嘅咖啡亦有水準，奶粉開上，有能力可以自己嘗試拉花。