漁吉海鮮丼專門店 (已搬遷) 新店位置

同幾位組員一朝早經歷完好大壓力嘅present，決定食lunch一定要食好西，好好慶祝一下困擾左幾個月嘅project終於完結啦。住九龍嘅組員推介不如去九龍城豪一豪，食個魚生丼飯。唔係佢帶路，我都唔知原來九龍城除咗食泰菜之外，原來仲有間出色海鮮丼。一坐低，店員就放低一壺水，倒出嚟先發現係味噌湯，而且係無限斟，以湯代替左茶。大家都做到心力交瘁，唔想用腦，跟曬大佬叫曬 漁吉特選丼飯。四碗 特選丼到！材料非常豐富，有十多款魚生/配料：帶子，三文魚，三文魚籽，赤蝦，海膽，油甘魚，星鰻，比目魚，櫻花魷魚，蟹籽，玉子。每款刺身都好新鮮，星鰻同海膽有輕轉火炙過，帶點焦香。丼飯已經加左醋調好味，唔洗點再落豉油，而且飯面除左魚生片外，仲舖左大量蟹籽同三文魚籽，每一啖都好滿足。大佬仲叫多左個小食，炸櫻包蝦豆腐。呢個出奇地好味，令我感到好驚喜！豆腐切到一粒粒，岩岩好可以一口食曬，外層係俾滿滿嘅櫻花蝦包圍住，外皮脆得嚟帶點蝦嘅咸味，入面係滑嘟嘟豆腐，好味道，光速被大家分曬！食飽飽，叉滿電，要番去繼續努力工作。