陸陸雞煲火鍋 (已結業)

旺角白布街真係越開越多野食，其實都好想食奶奶雞既但好多人，就過左隔離食呢個雞煲。一入去已經好鬼香！2個人叫左半隻小辣，果刻我心諗：唔知夠唔夠食呢？等左一陣終於食得～雞冇雪味，基本上煲左都好一段時間所以都算入味，痴埋啲汁食都幾好味，食食下發覺半隻原來都幾多，因為我地仲嗌左好多其他小食打邊爐。 基本上，店員們好醒水咁間唔時就會過黎幫我地搞搞個煲底以免痴底，成功K左啲雞就加湯打邊爐喇～先來必點肥牛！出乎意料地好稔好好味～不過一碟2個人食好似有啲多，畢竟都已經食左半隻雞。脆魚鯇真係唔可以滾太耐，因為我唔小心放耐左就變得好硬，我相信如果早點拎起食會好好味。手打丸真心彈牙！而且一條咁上碟好鬼靚～墨汁丸讚喎！最驚喜係個自家製響鈴！一上碟我就知一定好食，果然冇錯，佢唔似一般出面果種卷得好實，中間保留好多空間去吸湯，同埋個味我講唔出有咩唔同，但就係好好味～相對地我好期待既咸牛肉芝士釀油條就真係咸左少少，店員叫我地浸返20至30秒先好食，果然個油條稔少少先好食，因為太硬會戒親個口哈哈。食完成身都係雞煲味，要返屋企洗衫。