倫哥尊尚火鍋私房菜 (已結業)

早有聽聞過倫哥私房菜嘅火鍋好正，今日終於約到朋友黎試一試，我地去咗佐敦分店，一開頭見地址係二樓但無大廈名，本來驚好難揾，但各位可以放心，路痴嘅我都望到佢地大大個招牌，其實唔算難。一埋位，店員就俾咗小食，同花菇鮑魚招呼我地，花菇幾有驚喜，花紋幾靚，炆得淋又入味。主角雞煲黎到，店員提醒因為雞仲係生嘅，每隔兩分鐘要炒一炒，共4次以防痴底，過程大約8分鐘，麻煩少少但保證食到新鮮啱啱煮好嘅雞件，雞件嫩滑，醃得入味好好食，仲要無限添加，鍾意叫雞嘅朋友黎試下喇。我地係$288嘅套餐，主要係多咗牛頸脊，海鮮，手打墨魚滑，牛頸脊脂肪分佈平均，有咬口又非常香口，海鮮亦非常新鮮，墨魚滑亦唔會粉，好真材實料，數款海鮮同墨魚滑係任點任食。最後仲上咗甜品，椰汁雪燕滋潤下秋天帶黎嘅乾燥，店員服務周到，態度又好，值得一讚。