金凱小廚 (已結業)

朋友搬咗去大圍，即刻約我撐枱腳，帶我去美林邨冬菇亭懷舊一下，金凱小廚 推介勁抵食任食雞煲火鍋放題，仲送串燒。每位 $198 已經可以勁食2小時，開心開心！晚上一早坐滿，好受街坊歡迎，先食雞煲，後打邊爐， 任飲任食，再送每人三串串燒，喜歡飲啤酒的，性價比更高，唔使 $200 真係好滿意。串燒有驚喜好出色，特上牛脊肉，少食多滋味，下次可以考慮加錢揀任食串燒套餐。燒海鮮都有：蒜蓉燒生蠔、芝土焗生蠔🦪、蒜蓉燒扇貝、芝士焗扇貝。蠔大隻又唔腥，蠔肉飽滿多汁，芝士 和蒜蓉 口味都整得好食，好惹味，有咬口，值得推介！雞煲小辣惹味，麻香十足，雞件啖啖肉，醃得入味，肥美多汁，肉質仲好鮮嫩。店員服務態度好，食完雞煲即刻幫我哋上湯底打邊爐。湯底花膠雞濃湯湯底夠晒滋補，鹹味適中，花膠雞濃湯足料好好味。火鍋配料牛肉任食質素都唔錯，肥瘦適中，牛肉有濃郁的肉味。安格斯牛板腱、安格斯肩胛牛肉；脂肪比例平均，油花多，肉味重，口感嫩滑。手打牛筋丸十分彈牙好味，手打紫菜丸好高質。海蝦新鮮爽囗，鮮甜嫩滑。陳皮魚蛋唔係周圍都有得食，幾特別。送一碟蔬菜🥬有生菜、油麥菜及粟米，夠晒清新。最後飲埋冰凍嘅汽水，好爽呀！