麻辣Doi (已結業)

今晚同至愛喺元朗行街街,突然想食麻辣野,於是上Openrice搜下啦,比麻辣Doi店舖名吸引咗,見到呢間店舖主力做酸菜魚、烤魚和乾鍋，咁啱我哋又喺雞地附近,即刻去試吓!來到店舖地方雖然細小,裝修簡約,但環境同座位都坐得舒服。店員推介招牌菜;有麻辣香鍋、烤魚同水煮大盤酸菜魚。我哋揀咗老壇酸菜烤魚（小辣），本身配料份量已不少，有海蝦、雜菌、芽菜、豆卜同酸菜,我哋再加咗蓮藕片、娃娃菜同萵筍令配料再豐富些。鱸魚屬於中至大條，炸後外皮香脆,肉質嫩滑,師傅拿捏炸魚的時間剛剛好，食得出是新鮮魚，就算比酸辣湯煮浸後都很鮮甜,香口得來帶點甜酸又有微微麻辣,真係配絶。小食叫咗口水雞, 雖然見到好多紅油,但只是微辣,雞肉非常嫩滑, 雞皮爽脆,連怕肥的我都連皮食,一啲都唔油膩,值得一食。小炒我哋揀咗椒鹽海蝦鮮蝦連殼炸得酥脆,脆到連蝦頭都可以食埋,蝦肉爽口彈牙,連同椒鹽一齊食超野味。主食每人一碗米線和薯粉,用上酸菜湯底,兩碗粉份量十足，食完兩個都捧住肚走，幸福滿滿。