Day and Nite by Master Kama (已結業)

呢間好似係出名龍蝦，但由於我唔食得蝦，就冇試佢呢招牌菜。用app訂位有半價，可惜佢主餐牌選擇唔多，有龍蝦同premium嘅都唔得。所以只係叫左一個主menu上嘅吉列牛伴忌廉咖哩烏冬。入口咖哩味幾香，配上淡淡定嘅忌廉泡，平衡翻咖哩嘅濃味，味道唔錯。佢係前一排好hit嘅忌廉烏冬，面鋪满厚厚嘅白色忌廉，下面係烏冬，賣相特别。另外吉列牛炸得香口，有五塊，調味適中，牛味都幾香濃。佢用木砧板上，打卡一流。另外叫左嗰冇半價嘅定食，賣相好靚，有兩小碟漬物，飯面灑左啲飯素。因為係套餐，所以有野飲同餐湯，湯係磨菇湯，食得出有菇，同呀媽係屋企整嘅差唔多。佢用隻杯盛起上碟嘅，伴一小片蕃茄多士，頗有誠意。另外值得一提係呢間餐廳服務非常好，笑容满分。由一開始下單嗰時好詳細咁同我地講邊啲有優惠。食到中間唔小心倒瀉水，都有staff好細心咁留意到，然后即刻比紙巾我抹。到后尾走時更幫我地推門，好耐冇試過咁好服務嘅餐廳啦。不過一個小缺點係呢間餐廳係一間工廠大廈入面，雖然未至於好難揾，但門口指示唔清晰。未入去之前你唔會想像到咁嘅地方會有餐廳存在，好在佢勝在一入去環境温馨，食物又唔錯。