Dabyida Restaurant and Bar (已結業)

前排食左brunch ，依家愛上左。貪就貪佢一餐可以當兩餐食，放假嘅時候又唔會咁早起身，起身去食嘅時間就剛剛好，而且食嘅時間好長，唔會好趕，啱晒悠閑嘅假日。呢度晏晝有好多唔同嘅套餐，上至Pizza，下至扒類嘅都會有，而且出面會有一個自助嘅食物吧。講食物吧雖然唔算話好大，但係食物都應有盡有，有沙律，有巴拿馬火腿，沙樂美腸，芝士，甚至仲有各式各類的甜品。今日就叫咗個黑毛豬配藍啤梨汁，黑毛豬煮嘅時間需要耐小小，所以大家要預返三四個字嘅時間。其實平時我好少鍾意食豬扒嘅，但係黑毛豬就另計。因為黑毛豬同豬扒嘅肉質完全唔同。我怕就係怕普通嘅豬扒好鞋，但係黑毛豬就算煮得好差都好都唔會好似柴皮咁，呢度就煮得啱啱好啦。藍啤梨汁嘅配搭都十分之好，好特別嘅一個醬汁，會有少少甜甜地嘅味道。另外仲會配上薯角，熱辣辣嘅，加埋一舊豬扒非常之飽。仲想提一提大家，因為佢出面有一個自助嘅食物吧，所以每個人最低消費係一個套餐先至可以享用出面嘅沙律吧架。