影片
更多
2008-12-30
94 瀏覽
喺澳門食葡國菜有平有貴，豐儉由人，要又平又正，我就推介呢間林記燒烤，唔好睇佢個名就以為全部都係燒烤食物，佢都有唔少葡國菜、仲有日式燒烤、泰國菜、連橋底辣蟹、潮州凍蟹都有，可以話係多國菜！ 雖然地區好似吊腳啲，其實搭巴士都好方便，為咗食好嘢，捐窿捐罅週圍行我都在所不辭，今晚我哋山長水遠又嚟呢度食平靚正葡國菜： 法式炒花甲王：原本想叫泰式燒花甲王嘅，不過問過店員法式即係點整後，我哋就即刻改變咗主意嘞！呢個法式炒花甲王有啲葡國腸、紅椒絲、蔥同埋洋蔥一齊煮；花甲好大隻，顏色鮮艷，睇嚟好新鮮！味道好鮮甜又冇沙，個汁出呼意料之外嘅清甜，點包太稀，就咁飲好似海鮮清湯，正！ 葡式逼咸牛脷：牛脷好重牛味，但一啲羶味都冇亦冇筋，質感稔滑而且入口即化！ 配嘅汁有蕃茄味同有少少辣，好香濃又好惹味，點豬仔包一流！ 同煮嘅仲有炆得好稔嘅薯仔、紅蘿蔔、蕃茄、紅腰豆、洋蔥、椰菜同葡國腸，配料豐富，份量好多，好大堆頭好滿足！ 蒜子燒牛膝：呢個係今晚最貴嘅，$90而且係最後先到，嚟到嘅時候已經起晒肉，嚿骨就放喺側邊，可以見到啲肉起得好盡，因為嚿骨頭一啲肉都見唔到，啲燒牛膝肉排得頗整齊，賣相幾好；面頭有好多燒過嘅蒜子，發出
喺澳門食葡國菜有平有貴，豐儉由人，要又平又正，我就推介呢間林記燒烤，唔好睇佢個名就以為全部都係燒烤食物，佢都有唔少葡國菜、仲有日式燒烤、泰國菜、連橋底辣蟹、潮州凍蟹都有，可以話係多國菜！ 雖然地區好似吊腳啲，其實搭巴士都好方便，為咗食好嘢，捐窿捐罅週圍行我都在所不辭，今晚我哋山長水遠又嚟呢度食平靚正葡國菜：
法式炒花甲王：原本想叫泰式燒花甲王嘅，不過問過店員法式即係點整後，我哋就即刻改變咗主意嘞！呢個法式炒花甲王有啲葡國腸、紅椒絲、蔥同埋洋蔥一齊煮；花甲好大隻，顏色鮮艷，睇嚟好新鮮！味道好鮮甜又冇沙，個汁出呼意料之外嘅清甜，點包太稀，就咁飲好似海鮮清湯，正！
葡式逼咸牛脷：牛脷好重牛味，但一啲羶味都冇亦冇筋，質感稔滑而且入口即化！ 配嘅汁有蕃茄味同有少少辣，好香濃又好惹味，點豬仔包一流！ 同煮嘅仲有炆得好稔嘅薯仔、紅蘿蔔、蕃茄、紅腰豆、洋蔥、椰菜同葡國腸，配料豐富，份量好多，好大堆頭好滿足！
蒜子燒牛膝：呢個係今晚最貴嘅，$90而且係最後先到，嚟到嘅時候已經起晒肉，嚿骨就放喺側邊，可以見到啲肉起得好盡，因為嚿骨頭一啲肉都見唔到，啲燒牛膝肉排得頗整齊，賣相幾好；面頭有好多燒過嘅蒜子，發出陣陣誘人嘅香味！配汁係黑椒汁，熱辣辣亦好香濃惹味！牛膝肉外層燒得有啲焦香，邊沿較薄嘅位置好脆，內裡的肉仍然好幼嫩，肉汁豐腴，相當美味，真係值得等！
豬仔包：豬仔包外形飽滿夠大個，送上枱嘅時候有啲凍咗，不過仍然外脆內軟，質感綿密，係用嚟點有汁菜式嘅必配之選，全場張張枱都有，都咪話唔誇張！
呢間燒烤店冇乜裝修，不過佔地頗大有上下兩層，下層較少人，上層就晚晚爆滿，佢都有細廳房，一班人聚餐都可以！店內用嘅傢俬都係好普通嘅大方枱同埋有背椅，不過點菜方式就幾先進，每個店員頸上都掛有一張擦卡，你點完菜佢即刻喺掛牆嘅輕觸式電腦上落單，慳番好多時間，好揼本！店員招呼週到，有問必答，雖然做街坊生意多，對我哋呢啲遊客都好細心介紹菜式，唔錯！呢排佢又出新嘢嘞，叫禦寒三寶：羊頸煲、羊蹄煲，搵日會再嚟試吓！
張貼
