天府人家

營業中

休息中

再度相約「辣飯腳」食飯，今次因為時間關係只好揀去食午餐。「天府人家」一直喺我嘅「想去」list入面，今次決定就試下佢。去到11:30am啱啱開門，我哋無預先訂枱，店員小姐好好人，查完預訂表比咗張窗口枱我哋，不過要13:00pm還枱。有個半鐘頭夠晒時間食，鬼叫自己無訂位咩~環境好優雅舒服，好乾淨。我哋係衝住佢哋嘅午市套餐而嚟，叫咗2份套餐大家share食。川麵餐：紅油豬耳片、重慶金錢肚酸辣粉特式一人餐：涼拌海帶、酸菜魚片、生煎醬肉包(2隻)。個炸花生係送嘅，無諗過竟然都係辣㗎！紅油豬耳片同涼拌海帶又爽脆又勁辣，食得好過癮。重慶金錢肚酸辣粉嘅牛肚靱咗啲，小失望；但個湯同粉係好味嘅。不過真係低估咗呢度嘅辣度，食食下我哋倆個仲齊齊開始流眼淚水！愈食愈辣，最終頂唔順都係要叫返2罐汽水解解辣。好在我哋叫咗個酸菜魚片係唔辣嘅，除左有酸菜同魚片仲有薯粉。魚片好嫩滑，「辣飯腳」本身唔鍾意食魚都接受到，仲大讚話好好味。我哋掛住食粉都忘記咗有個生煎醬肉包，涼咗食都唔差，但無乜特別。臨走前店員小姐好有心，知道我哋第一次嚟唔清楚辣度，叫我哋下次可以叫小辣。仲有好多野想試，要搵日再嚟食下晚飯至得。