鼎泰豐 (已結業)

雖然呢個都唔係咩新野，但自己本身未試過鼎泰豐，同朋友係尖沙咀想搵一間可以傾下計同環境舒適既餐廳，行到美麗華廣場，唔想食太多，見又有得飲啖茶，就揀左喺美麗華一期既鼎泰豐。入到去，可能平日緣故所以樓面都唔算多人，唔洗等直接入去。首先黎左蒜香粉皮肉，感覺似食緊輕量蒜版既蒜泥白肉，蒜味無咁重咁辣度勁d，食落肉夠嫩滑又夠惹味，但食完都係會口臭XD小籠包都算細粒，但皮薄多汁，望落小籠包汁佔左小籠包既一半，好在皮唔易穿，相比平時有d餐廳整到好易漏湯，味道唔算特別出色但已經相當唔錯。主菜今次試左兩個炒飯，排骨蛋同蝦仁蛋炒飯。基本上兩款炒飯主要分別係飯面個餸，賣相黎講，蝦仁較吸引，但數量有d少（得幾粒蝦仁），相比排骨炒飯份量非常充足。味道方面我就會揀排骨，食落塊排骨唔會乾，又有濃濃既胡椒味，配個蛋炒飯都夠鑊氣，乾爽得黎又未至於太油，值得推介。另外紹興酒醉雞都要一試，去骨既雞肉夠滑，酒味唔算太濃但岩我haha，唯獨分量唔多，3個人分既過每人只得幾件。總括黎講，食物質素算中上，唔點得多小食既話價錢唔會太貴，係幾個人搵個位食小菜飲啖茶，環境適合傾計既好地方。