新越越式料理 (已搬遷) 新店位置

食九龍城唔一定食泰國野既，食返個越式餐都可以既。呢間餐廳門面簡潔，入到去夠曬闊落。點完菜後服務員就會擺返籃九層塔係枱上面。枱上面已經放左唔同的調味，可以隨便選用。食返個蟹肉湯檬$52，一見到就係紅色既湯底，其實係蕃茄湯。大半碗蟹肉絲係蕃茄湯上面，蟹肉雖然係絲，但都仲有好香既蟹味。幼細既湯粉，好索得湯味，口口都有濃香蕃茄同蟹肉味。另外仲有扎肉，成個蟹肉湯檬$真係幾足料。椒鹽軟殼蟹 $68，殼連肉一口咬入去超級爆脆口感。加上脆卜卜既椒鹽，好鬼惹味。越式豬頸肉 $52，外脆內軟。豬肉味香濃，火喉岩岩好。