Day and Nite by Master Kama (已結業)

朋友話帶我食龍蝦包，其實我最初唔知食邊間，只係話旺角站等。之後過到黎，突然"哦" 左一聲，原來係我以前都幾常幫襯既日式餐廳既原址，估唔到咁就易左手了...內裡既格局仲係同以前一樣，不過我記得以前黑色係主色，而家就藍白色為主。一心黎食龍蝦既我地，揀左個龍蝦匯餐，再叫d 野飲咁。石鍋飯最先黎，有隻大大隻龍蝦插左係度，好吸引呀！個湯因為有龍蝦汁，所以偏橙色，連埋佢dum 重本擺好多海鮮入去整，味道濃郁。因為d 飯吸晒d 湯汁，淨係食呢個都已經飽飽地...但龍蝦包都未食唔好俾佢停！個龍蝦包d 肉多到突晒出黎，粒粒飽滿，同埋最緊要方便唔使剪黎剪去，一啖咬落去好正呀...如果平時早餐d 麵包都有得夾隻龍蝦你話幾好呢...？另外果個蒜蓉烤龍蝦都唔錯既，會多左種烘焙過既鑊氣，加埋d 蒜蓉真係好香。同埋d 薯條都幾好食，最初我以為有兩隻唔同煮法既薯條，覺得深色d 果隻特別好食，然後才被朋友告之其實果d 係番薯...最後點左杯unicorn dream，係drink menu 既推介飲品！見人地檯都有點。賣相好靚呀，飲落原來係提子味沙冰，正好解一解d 熱氣呀！