すき焼 森 (歌賦街) (已搬遷) 新店位置

好難打得通電話，盡量去試，總會成功。一間小店，開業4年多，餐牌冇加過價。。。前菜係慕茸加菠菜，加上醬油，清新非常。到茶碗蒸，都係慕茸蒸蛋，蒸蛋真係非常合格，好滑又彈。今日好彩，有北海道生蠔，生蠔肥大肉厚，海水味唔重，但非常鮮嫩肥美多汁又甜。到劇肉，一塊近江A4牛，夾開慢慢食，先咩都唔好攪，就咁放入口，係開心到唔想出聲同講嘢，油脂分泌喺口入面捲起風浪。再夾件去沾蛋液，蛋液令到牛肉更加滑。最後夾埋白飯一齊食，飯粒沾上牛油，令原本巳經好香嘅米，加上色彩。食吓肉，食吓菜，菜都用燒過嘅牛留低嘅油煮，令到蔬菜重生一樣，肩肉就有啲咬口，都帶少少筋，牛味濃過西冷。如是者一牛一菜，都巳經飽飽哋，再嚟個滑蛋牛炒飯，我要少飯丫唔該。放近江牛肉粒落去，炒兩吓落蛋，炒兩吓落埋飯，非常專業，飯粒沾滿蛋、牛油，一匙羹仔放入口，好食到唔想咁快吞落肚呀。麵豉湯就帶點酸酸哋嘅味道，我冇留意聽侍應講係咩。最後我食柚子雪糕，飲熱檸水。坐Bar枱，廚師好專業、細心講解。侍應清枱倒啤酒跟得足。最重要係擺位，日本人攞位筷子係打橫放架。去日本超級市場，買碗近江牛肉飯都要二百幾，小店有咁高質素，唔怪得咁難訂位。