阿來東南亞風味 (已結業)

明明唔係第一次打風，但超市都係搶到咩都冇，只可以同老公出去填肚。本身諗住8號風下，有咩咪食咩囉， 點知屋企附近嘅阿來竟然有開，立即衝咗去食。點咗馬沙文海鮮咖喱同青咖喱，午餐都係幾十蚊份，價錢實惠抵食，轉薄餅仲唔加錢添！（食到一半先記得影）非常足料，咖喱係比較水嗰種，但都好夠味，好啱送飯。今時今日五六十蚊一餐晏，其實已經好抵食，平民餐廳而言，服務亦都好好，餐廳啲人都好nice。因為8號風球唔使我餓死，決心將第一篇食評用嚟寫呢間良心小店，祝佢哋長做長有，作為街坊嘅我一定會定期幫襯。