友記小食店

多數人都係去開隔離街貼滿明星相的大磡村友記, 但係我自己比較偏愛呢間A貨......其實呢間A貨都A唔晒, 而且都有段故仔, 話說好多年前友記的老闆係慈雲山開車仔麵檔, 後來輾轉搬左去大磡村, 最後大磡村遷拆, 就搬左去鳳凰新村, 呢間A貨就係佢以前係大磡村幫佢手的伙計開, 比較低調, 而舊老闆本來已經退休, 後來為左個仔大個都有盤生意仔, 最後又出山再搞左隔離街的友記, 仲搞都有聲有色

呢間友記鋪位較細, 得幾張檯, 都幾迫, 但係一樣咁多人, 但係點都少過隔離街的友記, 但係味道其實都差不多, 始終同出一轍, 佢地的餸有$3, $4 同$5, 麵底就$3-$4, 加$6有冷熱檸茶, 奶茶或咖啡

佢地的豬腸, 牛腩, 豬紅, 蘿白都好好味, 絕對傳統的嗱喳味道, 可惜佢地的酸齋落唔夠醋, 所以唔咁酸, 而小尤魚就好爽口, 撈沙嗲辣汁食一流, 其他地方都食唔到, 佢地的辣汁好正, 千祈唔好錯過

絕對係一碗出色的車仔麵, 又平又好味, 雖然已經唔係最傳統的嗱喳麵, 亦再無任何大磡村風味, 但已經比起坊間所謂車仔麵好好多, 足以令人回味無窮 懶理佢地係A貨定係正貨

2

$24

$14