道頓堀御好燒專門店 (新城市廣場) (已結業)

今日小編同男朋友去咗沙田行街，唔知大家會唔會都有一種想去旅行嘅感覺呢？小編同男朋友最鍾意就係日本，可惜今年疫情嚴重，睇怕都有一段長時間去唔到了。今日我哋就試咗道頓堀御好燒專門店，原來午餐時段有好多選擇，而且價錢十分之平易近人，但同晚餐單點嘅份量係一樣嘅。我哋已經好耐冇食過大阪燒之類嘅食物，於是我哋分別叫咗豪華御好燒，有得煎蛋之餘仲有拉麵。賣相十分之吸引，配料豐富，有一種幸福嘅感覺。成個過程都十分之容易操控，店員好細心咁指導我哋，亦都有比教學圖片我哋睇。成個過程大概15-20分鐘左右，主要都係反轉大阪燒。男朋友仲好細心咁煎咗個心形出嚟，係DIY嘅不二之選。醬汁係甜甜地嘅燒汁，亦都有沙律醬，紫菜同木魚碎可以任落，啱晒我依個紫菜控。大阪燒嘅味道十分之好，同我哋喺日本食嘅味道相近，而且只係$80 ，絕對係抵過晚餐好多。大阪燒亦幾大份，有好多配料，魷魚好惹味，同大阪燒十分之夾。總括而言，呢一間餐廳嘅午餐係十分之高質，而且亦都可以俾你同朋友DIY一齊整屬於自己嘅大阪燒，好玩得來味道又唔差。