米線陣 (加拿芬廣場)

營業中

休息中

米線陣係大家樂集團既，想來一餐經濟既就算，點知都有驚喜喎。講緊既係依個$58 DIY 黑椒肥牛石鍋燒。可以要烏冬或即食麵，包飲品，記住特飲都可！一上菜係咁既，肥牛都算多架，黑椒一早係入面，加少少配菜，無湯，就係咁煲住。開始時都驚煲燶d烏冬，但原來係食撈烏冬。所以有三個配料。我哋跟咗推介食法。首先將粟米、五香肉丁撈落去食第一轉先。芝士第二轉先加落去。撈咗就係咁。撈完烏冬好入味同辣，但黑椒味仍然香口同唔會俾五香肉丁既辣蓋過。好野味。就連肥牛都辣辣地，而且無根又唔鞋十十，好好味。食到咁上下就可以撈芝士啦。咁又係另一番風味，好香芝士味，但又唔會膩，因為黑椒同五香肉丁汁中和咗。另一個就清清地既魚腐蟹棒蘿蔔米線 $38。要講既係蘿蔔好入味，而且好多汁，唔通煲得耐所以吸晒d湯汁？至於魚腐蟹棒就不過不失啦。飲品叫少冰，但冰多都嚇死人！所以依杯冬青檸薏米水其實淡如水，只有食o個d薏米先有味囉。你話清清地又得，你話俾d冰整淡咗都得。我估d薏米同塊青檸都值加你$5既。