牛摩+ (新都城中心二期) (已結業)

星期六下午，响新都城無無聊聊咁閒逛，大概4點30分左右感覺有啲肚餓，就開始响商場搵食。去到牛摩，時間剛剛係4點50分。職員介紹餐廳午餐時段到5點正，此刻入座依然午市價錢，10分鐘後就已經係晚餐價位。即係話，我地心中選擇嘅特選美國牛肩胛套餐為例，就會於10分鐘內由有HKD135+ 一位變左HKD199+。既然如此，我地就馬上決定食個early dinner HKD135啦我地選擇左昆布清湯底同埋用草花雞湯底，兩個湯底味道都恰到好處，唔太濃唔太淡👍🏻👍🏻雖然呢個餐屬基本級，但美國牛肩胛肉質實在唔錯。而最重要嘅係啲火鍋配菜種類多，包括幾款蔬菜、菇類，仲有苦瓜同冬瓜，當然有不少丸類例如貢丸、包心丸同芝士丸，亦都有烏冬同蕎麥麵等等。另外，仲有甜品櫃內嘅小蛋糕同泡芙，仲有兩款雪糕🥰🥰。 整體上餐廳好乾淨俐落，坐位舒適，服務員都很勤快，係一間值得再嚟嘅餐廳👍🏻👍🏻。