El Cerdo (大壩街) (已結業)

荃灣廣場對面有間El Cerdo，門面睇落唔平，不過細心睇過餐牌後價錢其實唔太貴，呢晚就去試試。其中一面牆上係一幅用反光物料砌成嘅巨型畫作，細心咁睇原來係隻黑毛豬圖案。連餐墊紙都印咗黑毛豬圖案，同埋列出唔同部位嘅西班牙文，似乎黑毛豬係佢哋嘅招牌菜之一。試咗Mojito，餐牌寫採用冧酒、鮮青檸汁、薄荷葉、糖同蘇打水調出嚟，酒味唔濃，對女仔或少飲酒嘅人嚟講比較易入口，薄荷葉同鮮青檸嘅配搭又夠清新。然後係份量的骰嘅tapas，先嚟嘅係炸黑毛豬火腿球。吉列皮炸得金黃香脆唔油膩，內層就係5J級黑毛豬火腿碎同軟白汁，口感creamy，似晌度食緊極之軟身嘅忌廉薯蓉咁，又有啲似中式嘅炸鮮奶，味道唔錯。脆皮豬腩肉配蜂蜜蛋黃醬，豬腩肉嘅豬皮、脂肪同豬肉層次分明，豬皮脆卜卜，豬肉鬆化唔癡牙。蜂蜜蛋黃醬就加咗蒜蓉，酸酸甜甜咁可以減去膩感。最後仲試埋傳統洋蔥薯仔西班牙奄列，用咗洋蔥、馬鈴薯同雞蛋等煎成厚身嘅圓形。煎得外層焦脆，切片馬鈴薯同洋蔥絲軟腍，最內層仍然濕潤唔乾身。感覺上食物質素幾好，以同類型餐廳嚟講定價唔貴，如果晌九龍或港島區應該要多三分一至雙倍價錢，CP值都幾高。