鋒哥廚房 (已結業)

約咗朋友過嚟元朗食任食火鍋，除咗火鍋仲有麻辣雞煲和羊腩煲，真心豐富真心正！呢間餐廳位於御庭居地下，叫做＂鋒哥廚房＂，入邊裝修佈置好靚，打卡非常有風格。🐑呢啲天氣最啱食羊腩煲，呢度竟然有得食喎！仲要係任食，當然食盡佢啦！羊腩煲煮得非常好味，羊肉又香又腍，入邊仲有枝竹，馬蹄和冬菇，極之豐富。食唔夠又可以叫佢再加，新鮮熱辣食落去暖笠笠。🐓跟住再食麻辣雞煲，呢個又係一個暖笠笠嘅煲，但係暖得來就帶有刺激感，食落去條脷又麻又辣，味道非常惹味。不過因為我唔係好食得辣嘅就冇食咁多啦！呢個雞煲都係可以無限添加👍🍲最後就打邊爐收返靚尾。火鍋有一個免費湯底選擇，呢個皮蛋芫荽湯充滿芫荽香味🌿，啱晒芫荽嘅我。而且佢個湯底冇落味精，可以包一碗當湯飲，真係極之香！👍安格斯牛肉和海鮮都有得任食，當然蔬菜，丸類都係啦！今日就食個肚滿腸肥！😋食咗我最鍾意嘅粟米，鮑魚，冬菇，魚肚和魚片。有聚會當然就唔少得啤酒啦，餐廳有超多款生啤任飲，好彩聽日放假，今日飲多少少都唔怕！