緻 (已結業)

呢日去完Donki喺附近搵左間日本餐廳開餐🥰🥰小店招牌菜係日式串燒，半室外坐位打卡都好靚，走簡約新式居酒屋風格。佢地個set lunch好抵食，而且好足料。主菜份量十足，跟餐有沙律，有茶碗蒸又有麵豉湯。鮮蝦蘆筍沙律蝦好多，最欣賞係用左蘆筍做沙律，比起用青瓜口感更嫩滑。柑橘醋汁好清新開胃，加埋濃厚嘅溫泉蛋令成個沙律味道更有層次。串燒丼性價比好高，足足有5串串燒，3串肉類2串瓜類。鹽燒最能表現到食材嘅優劣，蔬菜同肉都好新鮮，火侯亦都啱啱好，我最鍾意雞肉軟骨串，帶微微焦香，肉同軟骨比例都好配合🥰🥰