京都抹茶庵 (已結業)

同朋友喺K11行完街，經過呢間抹茶專門店，入面好似有好多甜品同飲品都好吸引，於是決定入去嘆吓冷氣，飲杯茶、食個甜品嘆吓先。最近做緊推廣焙茶甜品menu，抹茶同焙茶都係我嘅favourite，今次就試咗焙茶先啦。焙茶流心蛋糕卷$78- 一開始都擔心蛋糕卷會整到好似嘉頓蛋糕嘅味道，就咁食個蛋糕真係普通咗少少。加埋普通忌廉同焙茶忌廉、焙茶粉會好食好多。忌廉打得幾輕盈，唔會好肥膩，但係其實冇流心嘅效果，有啲失望。隔離嘅紅豆蓉有啲過甜，花花黑糖大菜膏都麻麻哋，果然有焙茶成份嘅甜品先好味啲，不過蛋糕卷性價比偏低。焙茶牛奶(熱)$52- 牛奶暖暖哋，奶味重過焙茶味，喺我嘅角度佢可以再落少啲糖，會更合我口味。五十幾蚊都幾貴。焙茶芭菲 $92- 超級大杯，食完好滿足，焙茶雪糕好濃味，底層仲有好多焙茶啫喱布甸同脆米通。個人認為呢個抵食過蛋糕卷或者焙茶牛奶，推介！煎茶$38- 煎茶熱辣辣，食完雪糕再飲一啖熱茶最好不過。