孖寶 (已結業)

之前同男朋友都黎過一次，一直都想同屋企人試下，今次終於得閒試到喇。上次試左安全既牛扒同意粉，都相當滿意，今次信心滿滿意下新野！屋企人見到是日推介已經揀好左，試下鹽燒油甘魚配蜜糖柚子汁，係我地上水呢啲水貨城真係好少西餐肯做龍脷柳以外既魚架，hahaha。另一個就揀左烤黑豬鞍架。餐湯同飲品好快就到，南瓜湯好甜：）先到既係屋企人揀既油甘魚。份量十足，而且鹽燒完之後，咬落仍然有肉汁，加上厚切既份量，咬落口感好滿足，再加上旁邊既蜜糖柚子汁，我同屋企人都好鍾意。後到既係黑豬鞍，從圖中可見到，一樣份量十足，表面微微金黃，望落非常吸引。不得不提既係佢地用心既薯菜，係上水西餐主食好食已經難得，仲要連薯菜都做得咁有心機，一定會再幫襯呢間小店。